Saturday, July 7, 2018

IGP Sirro akemea uhalifu wa majini

Mkuu wa Jeshi la Polisi nchini (IGP) Simon Sirro ametangaza kiama kwa maharamia na wahalifu wanaofanya uhalifu ndani ya Ziwa Victoria, maziwa mengine na bahari ndani ya mipaka ya Tanzania akisema siku zao zinahesabika.

Akizungumza wakati wa hafla ya kufunga mafunzo ya mwezi mmoja kwa askari polisi 30 wa kikosi cha maji jijini, IGP Sirro alitaja matukio yatakayokomeshwa ndani kipindi kifupi kijacho kuwa ni pamoja na yale ya kuvamiwa na kuporwa kwa wavuvi ndani ya ziwa hilo linalochangiwa na nchi tatu za Kenya, Uganda na Tanzania.

“Serikali imejipanga kukomesha uhalifu ndani ya maji yote ndani ya mipaka ya Tanzania; siku za maharamia ndani ya Ziwa Victoria na maeneo mengine nchini zinahesabika,” amesema IGP Sirro

Amesema askari waliofuzu mafunzo hayo pamoja na wengine ambao tayari wamenolewa kukabiliana na maharamia ndani ya maji watatumika kufanya doria ziwani kudhibiti uhalifu wa aina zote ikiwemo wizi na biashara haramu.

Katika mikakati hiyo, Serikali kwa mujibu wa IGP itanunua boti na zana za kisasa kwa ajili ya doria ziwani.

Mkuu wa Chuo cha Wanamaji kilichopo jijini Mwanza, Naibu Kamishna wa Polisi Mboje Kanga alisema pamoja na mafunzo ya nadharia darasani, askari hao pia wamepata mafunzo kwa vitendo ndani ya ziwa na kufuzo kwa viwango vya juu katika mapambano dhidi ya vitendo vya ujangili, uharamia, ugaidi na aina zote za uhalifu ndani ya maji.

“Asakari wanaohitimu mafunzo katika chuo hiki kilichoanzishwa mwaka 2011 wana uwezo, ujuzi na ujasiri wa kupambana na uhalifu na vitendo vyovyote haramu ndani ya mito, maziwa na bahari,” amesema Kanga
==


Advertisement
Usipitwe na Habari Yoyote. Install Mpekuzi App kwenye Simu Yako Upate Habari Zetu kwa Wepesi Zaidi

==>>... << BOFYA HAPA  Kui Install>>
==

....

===
Tupe Maoni Yako( Matusi Hapana )